தமிழகத்தில் விதிமுறைகளை மீறி செயல்படும் டாஸ்மாக் கடைகள் குறித்து பொதுமக்கள் ரீல்ஸ் மற்றும் சமூக வலைதள வீடியோக்கள் மூலம் ஆதாரங்களுடன் வெளிக்கொண்டு வர வேண்டும் என்று ‘வீ த லீடர்ஸ்’ இயக்கம் அழைப்பு விடுத்துள்ளது.
பொள்ளாச்சியில் நடைபெற்ற விழிப்புணர்வு நிகழ்ச்சியில் பேசிய இயக்கத்தின் நிர்வாகிகள், பள்ளிகள், வழிபாட்டுத் தலங்கள் மற்றும் குடியிருப்புப் பகுதிகளுக்கு அருகில் விதிமுறைகளை மீறி செயல்படும் டாஸ்மாக் கடைகள் இருப்பின், அவற்றை புகைப்படம் அல்லது வீடியோவாக பதிவு செய்து சமூக வலைதளங்களில் பகிருமாறு கேட்டுக்கொண்டனர்.
பொதுமக்களின் ஒத்துழைப்புடன் சட்டவிரோத செயல்பாடுகளை வெளிச்சத்துக்கு கொண்டு வருவது மட்டுமல்லாமல், சம்பந்தப்பட்ட அதிகாரிகளின் கவனத்திற்கும் கொண்டு செல்ல முடியும் என்றும் அவர்கள் தெரிவித்தனர்.
மேலும், பகிரப்படும் வீடியோக்கள் உண்மைத்தன்மை கொண்ட ஆதாரங்களுடன் இருக்க வேண்டும் என்றும், தவறான தகவல்களை பரப்புவதை தவிர்க்க வேண்டும் என்றும் அறிவுறுத்தினர்.
போதைப்பொருள் மற்றும் மதுபான பயன்பாட்டிற்கு எதிராக சமூக விழிப்புணர்வை ஏற்படுத்தும் நோக்கில் இந்த முயற்சி மேற்கொள்ளப்படுவதாகவும், தமிழகம் முழுவதும் பொதுமக்களின் பங்களிப்பை எதிர்பார்ப்பதாகவும் ‘வீ த லீடர்ஸ்’ இயக்கம் தெரிவித்துள்ளது.
