சென்னை: மதுராந்தகம் சட்டப்பேரவைத் தொகுதி இடைத்தேர்தலை முன்னிட்டு, அதிமுக பொதுச்செயலாளர் மற்றும் முன்னாள் முதல்-அமைச்சர் எடப்பாடி பழனிசாமியின் 2 நாள் தேர்தல் பிரசார பயணத் திட்டம் வெளியிடப்பட்டுள்ளது.

அதிமுக தலைமைக் கழகம் வெளியிட்டுள்ள அறிவிப்பின்படி, எடப்பாடி பழனிசாமி செப்டம்பர் 24 மற்றும் 26 ஆகிய தேதிகளில் மதுராந்தகம் தொகுதியில் அதிமுக வேட்பாளரை ஆதரித்து பிரசாரம் மேற்கொள்ள உள்ளார்.

செப். 24: 4 இடங்களில் பிரசாரம்

செப்டம்பர் 24ஆம் தேதி பிற்பகல் 3 மணிக்கு மாமண்டூரில் பிரசாரத்தை தொடங்கும் எடப்பாடி பழனிசாமி, மாலை 4.30 மணிக்கு பூதூர், மாலை 6 மணிக்கு தேவத்தூர், இரவு 7 மணிக்கு சரவம்பாக்கம் ஆகிய பகுதிகளில் வாக்கு சேகரிக்கிறார்.

செப். 26: மீண்டும் 4 இடங்களில் வாக்கு சேகரிப்பு

இரண்டாவது நாளான செப்டம்பர் 26ஆம் தேதி பிற்பகல் 3 மணிக்கு எல். எண்டத்தூர், மாலை 4.30 மணிக்கு ராமாபுரம், மாலை 6 மணிக்கு எலப்பாக்கம், இரவு 7 மணிக்கு ஒரத்தி ஆகிய இடங்களில் பிரசாரம் நடைபெற உள்ளது.

மதுராந்தகம் மற்றும் தாராபுரம் தொகுதிகளுக்கான இடைத்தேர்தல் அக்டோபர் 6ஆம் தேதி நடைபெற உள்ளது. இதற்கான தேர்தல் பிரசாரத்தை முக்கிய அரசியல் கட்சிகள் தீவிரப்படுத்தி வருகின்றன. அதிமுக சார்பில் மதுராந்தகம் தொகுதியில் கணிதா சம்பத் போட்டியிடுகிறார்.

மதுராந்தகத்தில் எடப்பாடி பழனிசாமியின் 2 நாள் பிரசார பயணத்தை முன்னிட்டு, அந்தந்த பகுதிகளில் தேர்தல் பணிகளை ஒருங்கிணைக்க அதிமுக நிர்வாகிகளுக்கு கட்சித் தலைமை அறிவுறுத்தியுள்ளது.