சென்னை: நடிகர் ஆர். மாதவன் நடிப்பில் உருவான ‘G.D.N.’ திரைப்படம் நெட்ஃபிளிக்ஸ் தளத்தில் வெளியாகிய பிறகு, பார்வையாளர்களிடையே நல்ல வரவேற்பை பெற்று வருகிறது. இந்தியாவில் நெட்ஃபிளிக்ஸ் டாப் 10 திரைப்படங்கள் பட்டியலில் இடம்பெற்ற இப்படம், தற்போது உலகளாவிய டாப் 10 திரைப்படங்கள் பட்டியலிலும் இடம்பிடித்துள்ளது.

கோவையைச் சேர்ந்த கண்டுபிடிப்பாளரும் தொழிலதிபருமான ஜி.டி. நாயுடுவின் வாழ்க்கையை மையமாகக் கொண்டு உருவாக்கப்பட்ட இந்தப் படத்தில், ஆர். மாதவன் ஜி.டி. நாயுடு கதாபாத்திரத்தில் நடித்துள்ளார். சத்யராஜ், ஜெயராம், பிரியாமணி, துஷாரா விஜயன் உள்ளிட்ட பலரும் முக்கிய கதாபாத்திரங்களில் நடித்துள்ளனர்.

கிருஷ்ணகுமார் ராமகுமார் இயக்கியுள்ள ‘G.D.N.’ திரைப்படம், ஜி.டி. நாயுடுவின் கண்டுபிடிப்புகள் மட்டுமின்றி, அவரது தொழில்நுட்ப முயற்சிகளுக்கு எதிராக உருவான தடைகள் மற்றும் காலனிய ஆட்சிக் காலத்தில் அவர் எதிர்கொண்ட சவால்களையும் கதைக்களமாகக் கொண்டுள்ளது

ஆகஸ்ட் 7-ம் தேதி திரையரங்குகளில் வெளியான இப்படம், செப்டம்பர் 4 முதல் நெட்ஃபிளிக்ஸில் தமிழ், இந்தி, தெலுங்கு, கன்னடம் மற்றும் மலையாளம் ஆகிய மொழிகளில் ஸ்ட்ரீமிங் செய்யத் தொடங்கியது. இதன் மூலம் திரையரங்குகளில் பார்க்கத் தவறிய ரசிகர்களையும் படம் சென்றடைந்துள்ளது. 

நெட்ஃபிளிக்ஸ் இந்தியாவின் அதிகாரப்பூர்வ வாராந்திர டாப் 10 தரவரிசையில், ஆகஸ்ட் 31 முதல் செப்டம்பர் 6 வரையிலான காலகட்டத்தில் ‘G.D.N.’ 6வது இடத்தில் இருந்தது. அதன்பிறகு செப்டம்பர் 10-ம் தேதிக்கான இந்திய தினசரி பட்டியலில் 3வது இடத்துக்கு முன்னேறியதாக தரவு காட்டுகிறது

இதன் தொடர்ச்சியாக உலகளாவிய டாப் 10 பட்டியலிலும் படம் இடம்பெற்றிருப்பது, ஜி.டி. நாயுடுவின் வாழ்க்கை மற்றும் இந்தியாவின் கண்டுபிடிப்பு வரலாற்றை சர்வதேச பார்வையாளர்களிடம் கொண்டு செல்லும் வாய்ப்பாக அமைந்துள்ளது.